Mentres que en Occidente falar sobre a pandemia parece pertencer ao pasado, en China multiplícanse as mobilizacións e as protestas contra as medidas sanitarias, sobre todo en cidades como Cantón, Pequín, Xangai e Wuhan. Novos enfrontamentos estalaron entre manifestantes e policías a pesar da chamada das autoridades para aplicar « medidas enérxicas » para reprimir […]
Mentres que en Occidente falar sobre a pandemia parece pertencer ao pasado, en China multiplícanse as mobilizacións e as protestas contra as medidas sanitarias, sobre todo en cidades como Cantón, Pequín, Xangai e Wuhan.
Novos enfrontamentos estalaron entre manifestantes e policías a pesar da chamada das autoridades para aplicar « medidas enérxicas » para reprimir a onda nacional de protestas contra as restricións polo coronavirus e a favor de máis liberdades. Así, trátase do maior movemento de protesta desde as manifestacións en favor da democracia en 1989, que foron reprimidas de forma moi brutal polas autoridades.
Moitas das manifestacións dos últimos días parecen estar relacionadas cun incendio nun bloque de pisos na cidade norteña de Urumqi, onde se culpou ao confinamento de dificultar as tarefas de rescate. Polo menos dez persoas morreron no accidente. As autoridades chinesas negan as acusacións. En Pequín, os manifestantes organizaron unha vixilia para as vítimas e protestaron contra as restricións pola COVID, e moitas persoas ondearon follas en branco como símbolo da censura. Durante unha protesta a pasada fin de semana, oíuse mesmo á xente gritar abertamente « Xi Jinping, dimite » e « Partido Comunista, dimite », unha crítica pública que é altamente inusual en China por mor do medo ás represalias.
Estas protestas teñen lugar nun contexto no que os estragos da dura estratexia de COVID cero aplicada en China sentíronse durante meses, co desemprego xuvenil alcanzando o 20%, as ganancias corporativas reducidas e un importante decrecemento económico. Ademais, debemos subliñar que a política de cero tolerancia fronte á pandemia non conseguiu controlar sucesivos repuntes de casos. A poboación chinesa está farta dos confinamentos imprevisibles, as corentenas prolongadas e as probas masivas, que considera actualmente inxustificados. Con todo, o presidente chinés négase aínda a ceder na estrita estratexia gobernamental contra a enfermidade. Por outra parte, os medios de comunicación seguen escondendo e manipulando a información sobre o que ocorre actualmente no país.
En todo caso, este é un exemplo máis da vulneración dos dereitos da poboación chinesa á que o goberno recorta sen cesar as liberdades individuais. Desde Amnistía Internacional, non podemos senón denunciar a vulneración dos dereitos da poboación chinesa, nunha situación marcada polo excepcionalismo de estado, e na gran parte das ocasións inxustificado, que leva xa durando máis de dous anos.
Fontes :
- « China registra nuevas protestas contra confinamientos », Deutsche Welt: https://www.dw.com/es/china-registra-nuevas-protestas-contra-confinamientos/a-63947859
- « En fotos: las insólitas protestas en China contra las restricciones por la covid », BBC News: https://www.bbc.com/mundo/noticias-internacional-63790275
- « Las protestas en China suceden tras meses de penurias económicas », The New York Times: https://www.nytimes.com/es/2022/12/01/espanol/economia-china-covid-protestas.html
- « ¿Qué está pasando en China tras las protestas contra la política de cero covid? Esto es lo que necesitas saber », CNN: https://cnnespanol.cnn.com/2022/12/01/que-pasa-china-protestas-contra-covid-cero-esto-necesitas-saber-trax/
- « China’s Covid policy didn’t have to end in riot and protest. This is why it did », The Guardian: https://www.theguardian.com/commentisfree/2022/dec/05/china-covid-policy-riot-protest
- « China: se extienden las inusuales protestas contra la política ‘Covid cero’ y el Gobierno de Xi », France 24: https://www.france24.com/es/asia-pacífico/20221128-china-se-extienden-las-inusuales-protestas-contra-la-política-covid-cero-y-el-gobierno-de-xi
