As institucións locais autonómicas, tentan xustificar a problemática actual baseándose na falta de oferta e na necesidade de nova construción, esquecendo que a raíz do problema é a especulación.
Foto cedida por As Ninguéns. Mobilización da Alianza pola Vivenda Vigo no MARCO o venres 6 de novembro para reclamar medidas ao Concello e á Xunta.
A situación da vivenda en Vigo non deixa de recruar. Os prezos non deixan de medrar e semellan non ter tope. A oferta de vivenda habitual redúcese e tanto o Concello de Vigo como a Xunta de Galicia non están poñendo os esforzos precisos en mobilizar ás máis de 22.000 vivendas baleiras da cidade.
As institucións, tanto locais como autonómicas, tentan xustificar a problemática actual baseándose na falta de oferta e na necesidade de nova construción, esquecendo a raíz do problema que é a especulación. Que cada cinco anos cumprindo as nosas obrigas como inquilinas nos boten a rúa para poder subir abusivamente o alugueiro é especulación. Que utilicen contratos de tempada para reducir os dereitos das persoas inquilinas e poder subir abusivamente a renda ou botarnos cando lles apeteza é especulación. Que partillen un piso e o aluguen por habitacións para sacarlle máis rendemento é especulación. Que saquen as vivendas do mercado residencial para alugalas como pisos turísticos é especulación.
Unha crise habitacional que afecta á clase traballadora, á mocidade e ás pensionistas, pero tamén ás colectivas vulnerables e invisibilizadas como as persoas migrantes, racializadas, con diversidade funcional, en situación de rúa, en risco de exclusión, traballadoras sexuais, LGBTIQA+, familias monoparentais e multiespecie que sofren nas súas carnes os abusos, o racismo e a discriminación do sector inmobiliario, limitando aínda máis o seu acceso a un fogar.
Polo tanto, se queremos confrontar o conflito da vivenda é preciso combatelo dende a súa raíz, con medidas valentes e contundentes que contribúan a facer efectivo o dereito a teito, garantindo que toda persoa que o precise poida acceder a unha vivenda digna, estable e asumible.
Demandamos ao concello e á Xunta:
- Declarar Vigo como zona de mercado tensionada para poder aplicar o control de prezos do alugueiro e confrontar directamente a especulación.
- Crear un parque público xa a partir da vivenda existente, mobilizando a vivenda baleira con altos gravames para os multipropietarios e recuperando as vivendas de fondos e bancos.
- Frear os pisos turísticos a través dunha moratoria en todo o concello.
- Parar os Proxectos de Interse Autonómico de Lavadores, procurar ubicacións onde non se expulse á veciñanza nen os usos tradicionais agrícolas, apostando por unha consulta a fondo coas comunidades afectadas e a distribución da vivenda pública polos diferentes barrios da cidade.
- Garantir que ningunha persoa en situación de vulnerabilidade afectada por un despexo quede sen alternativa habitacional.
- Solucións reais, marcos lexislativos e políticas públicas para colectivas vulnerables e invisibilizadas que garantan a protección e acompañamento integral fronte aos abusos, á persecución da racialización, á xenofobia, lgtbifobia e calquera outra forma de discriminación do sector inmobiliario.
- Aplicar un plan con perspectiva de xénero para rematar co senfogarismo e o chabolismo garantindo o acceso a unha vivenda digna, estable e asumible para tódalas persoas que o precisen.
Non esiximos nada que non se poida lograr con vontade política. E se os respectivos gobernos non a teñen, o pobo teremos que forzalos a tomar as medidas que a cidade e o país necesitan. A loita continúa e non pararemos no noso empeño ata acadar que o dereito a teito sexa un feito.
A vindeira parada: a Folga Xeral do 11 de novembro. É a nosa oportunidade de parar o país para reivindicar os nosos dereitos. E, para elo, é fundamental que paremos a produción, que pechemos ese día os nosos negocios, que non merquemos e non consumamos máis aló do estritamente necesario, e que enchamos as rúas para esixir cambios que permitan confrontar a actual precariedade e carestía da vida.
Polo dereito a teito, pola suba dos salarios e as pensións e pola defensa do público!
Porque os dereitos non se regalan, conquístanse! Vémonos nas rúas!!
