Nos próximos meses pode producirse un tsunami de desafiuzamentos coa activación dos 70.000 desafiuzamentos paralizados
Fotografía: Lawrence JC Baron / SplashNews.c / GTRES
As organizacións sociais denuncian a falta de acción das administracións para defender o dereito á vivenda e chaman á mobilización nas rúas durante as próximas semanas
29 de abril de 2026
Segundo a Coalición #NiUnDesahucioMás, que engloba a máis de 100 organizacións sociais, neste mes de vixencia da Real Decreto Lei solicitáronse máis de 33.500 prórrogas.
Onte martes, o Congreso dos Deputados votou a validación da Real Decreto Lei para a prórroga de alugueiros e a limitación á subida interanual da renda do alugueiro, que decaeu ao votar en contra o PP, VOX, JUNTS e UPN, a mesma coalición que tombou hai escasos meses a moratoria antidesafiuzamentos. Ademais, nesta última votación o PNV abstívose.
A Coalición #NiUnDesahucioMás calcula que neste mes de vixencia do Real Decreto solicitáronse máis de 33.500 prórrogas**, que a propiedade e os tribunais deberán respectar ao solicitarse durante o seu período de vixencia e gozar de total validez xurídica. Con todo, a pesar do esforzo realizado polas organizacións sociais para chegar a este número de prórrogas, centos de miles que non o puideron solicitar quedarán en desprotección ao non validarse a Real Decreto-Lei. Segundo cifras do Ministerio de Consumo, ao redor dun millón de fogares inquilinos podían acollerse á prórroga, medida que tivo un amplo eco social e mediático, de xeito que o número de prórrogas solicitadas foron moi superiores á cifra estimada polas nosas organizacións.
“Preséntase un contexto alarmante para o dereito á vivenda”, declarou Sara Prieto, voceira de Amnistía Internacional en Galicia. “Coa caída da moratoria anti-desafiuzamentos e a prórroga de alugueiros, nos próximos meses pode producirse un tsunami de desafiuzamentos. A activación dos 70.000 desafiuzamentos paralizados, máis todos os desafiuzamentos invisibles que se produzan daqueles alugueiros que non se acollesen á prórroga, agravará de xeito exacerbado a crise de vivenda que atravesa o país”. Segundo o Consello Xeral do Poder Xudicial, o 88% dos 994 lanzamentos producidos en Galicia en 2025 foron de vivendas alugadas.
“Denunciamos que as administracións públicas non están a dar resposta a esta grave crise e mesmo en zonas onde nin sequera se fixo declaración de zona de mercado residencial tensionado non existe provisión razoable de vivendas para acoller a toda a xente que será desaloxada nos próximos meses e anos, se non se toman medidas moito máis ambiciosas”.
Desde a Coalición #NiUnDesahucioMás, pensamos que esta situación non poderá ser mitigada coa recente aprobación do Plan Estatal de Vivenda, que, aínda que aposta por ampliar o parque de vivenda de protección oficial permanente, non prevé os recursos suficientes para conseguir as cantidades inxentes de vivenda a prezo alcanzable que se necesitan para mitigar o principal problema da sociedade española. Ademais, ata que se apliquen as medidas propostas no Plan, as familias seguirán sen poder acceder a vivendas e seguirán sufrindo desafiuzamentos diarios.
Reclamamos unha vez máis un plan de continxencia ou “de choque” valente que aborde de xeito estrutural e inmediato o problema da especulación coa vivenda. Entre as medidas propostas debería incluír a recuperación da moratoria de desafiuzamentos, contratos de arrendamento indefinidos, control de prezos da vivenda e captación de vivenda mediante a figura do tento e retracto para ser destinada a alugueiro social e alcanzable. Trátase de medidas conxunturais imprescindibles mentres se traballa para aumentar o parque de vivenda social que nos equipare aos países máis avanzados do mundo na materia, nos cales afirmar que “a vivenda é o quinto piar do estado do benestar” non soa a slogan senón a realidade.
Á súa vez, mentres que se reduce a protección en materia de vivenda coa poboación vulnerable, está a producirse unha inacción por parte das administracións públicas ante o mercadeo de fondos voitre con antiga vivenda pública. Hai escasas semanas facíase pública a venda de 5.000 vivendas de Blackstone a Brookfield, deixando nas pavías a situación dos seus inquilinos.
Ante todos estes acontecementos, a Coalición #NiUnDesahucioMás anuncia que durante as próximas semanas convocaranse mobilizacións masivas para facer fronte a esta situación e sinalar a todos os responsables políticos, e fai un chamado á cidadanía para que esixa na rúa e de xeito urxente medidas a todos os niveis da administración que sexan solucións reais ao problema da vivenda. **A cifra estimada de prórrogas solicitadas é unha aproximación de mínimos, obtida a partir das descargas nas webs oficiais das organizacións que habilitaron documentos específicos para que os e as inquilinas se acollesen ao Real Decreto-lei 8/2026. Moitas das organizacións sociais asinantes difundiron os documentos mencionados, asesorando ademais nas súas organizacións territoriais a fogares inquilinos sen chegar a contabilizalos.
